Þurfa að taka á sig 15 prósenta tekjuskerðingu

Hótelrekendur þurfa að taka á sig fimmtán prósenta tekjuskerðingu ætli þeir að halda verðum óbreyttum þrátt fyrir hærri virðisaukaskatt. Hótelhaldari segir að taka þurfi tillit samkeppnisaðstöðu íslenskra ferðaþjónustuaðila því erlendir ferðamenn hafi um margt annað að velja.

Algengt verð fyrir hótelherbergi er í dag í kringum 20 þúsund krónur, en með sjö prósent virðisaukaskatti gerir það 21400 krónur sem ferðamaðurinn greiðir.

Með tilkomu hærri virðisaukaskatts ætti þetta verð að hækka upp í 25100 krónur en þar sem að margir ferðaþjónustuaðilar eru búnir að festa verð við erlenda samstarfsaðila fyrir næsta ár þurfa þeir að taka hækkun skattsins á sig sjálfa. Þannig fá þeir í raun einungis rúmar 17 þúsund krónur fyrir herbergi sem er þrjú þúsund krónum minna eða tæplega 15 prósent tekjuskerðing af hverju einasta herbergi.

„Greinin er eiginlega sett í hálfgerða sjálfheldu vegna þess að ef hún reynir að hækka verðið til að mæta þessum kostnaðarauka mun það setja samkeppnishæfninga í allt aðra stöðu. Ef hún á að taka á sig 15% tekjuskerðingu, þá þýðir það að það mun hafa gríðarleg áhrif á hæfileika hennar til að ráða til sín fólk og halda uppi þeim dampi sem hún hefur verið að gera," segir Friðrik Pálsson, hótelhaldari á Hótel Rangá.

Hann vísar því á bug að ferðaþjónustan hafi verið að starfa á ívilnunum eins og fjármálaráðherra hélt fram eftir fund með ferðaþjónustuaðilum í gær.

„Það hefur komið fram að nánast öll lönd í Evrópu sem meta ferðaþjónustuna einhvers og þau störf sem hún skapar, þau láta hana vera í neðra skattþrepi og þau orð dæma sig algjörlega sjálf."

Til dæmis er virðisaukaskattur á gistingu 8 prósent í Noregi og á Spáni og 7 prósent í Þýskalandi. Þá þykir mörgum það einnig skjóta skökku við að til dæmis dagsferðir fyrir ferðamenn hafi verið undanþegnar virðisaukaskatti í langan tíma.

Finnst þér þá eðlilegt að þið séuð að borga lægri skatt en önnur fyrirtæki sem borga almennt séð 25,5 prósent virðisauka?

„Þetta snýst ekki um það heldur hvort við séum með samskonar samkeppnisaðstöðu eins og aðrir aðildar erlendis sem við erum að keppa við. Gleymið því ekki að í þessu samhengi, nánast allir sem skila þessum fjármunum til ferðaþjónustunnar það eru erlendir ferðamenn, yfirgnæfandi fjöldi. Þeir hafa um mjög margt annað að velja, þeir koma ekkert endilega til Íslands út af því að hér er góð náttúra sem við erum stolt af heldur líka af því það hefur verið mjög hagkvæmt að koma til Íslands á undanförnum misserum."