Mikið um að vera á Unglingalandsmóti

Veðrið hefur leikið við gesti og landsmótsgesti á Unglingalandsmótinu í dag. Keppt var í fjölmörgum greinum í dag og auk þess var ýmiss afþreying í boð. Um 50 krakkar tóku þátt í sundleikunum á unglingalandsmótinu sem var að ljúka í Sundhöll Selfoss. Krökkum 10 ára og yngri var boðið að taka þátt í tveimur greinum, annars vegar 25 metra sundi með frjálsri aðferð og annars vegar 50 metrum með frjálsri aðferð með blöðkum.

„Það er óhætt að segja að það hafi verið líf og líf og krakkarnir skemmtu sér vel," segir Magnús Tryggvason annar stjórnandi sundsins, í fréttatilkynningu, en auk Magnúsar hafði Svanur Ingvarsson umsjón með sundinu.

„Þá fóru einnig fram frjálsíþróttaleikar fyrir 10 ára og yngri og fékk ungviðið að spreyta sig í langstökki, hlaupi og kúluvarpi svo eitthvað sé nefnt. Fjöldi krakka tók þátt í leikunum. Þó nokkur fjöldi tók í dag þátt í gönguferð um Selfoss og nutu göngumenn leiðsagnar Þórs Vigfússonar. Gönguferðin var einn af dagsskrárliðum unglingalandsmótsins í dag. Það var varla hægt að óskar sér betra veður en á Selfossi í dag er sólskin og hitinn nálægt 20 stigum.

Þá var tilkynnt að 18. Unglingalandsmót UMFÍ færi fram á Akureyri 2015. Áður var ljóst að mótið 2013 yrði á Höfn í Hornafirði og 2014 á Sauðárkróki. Vallarmet var slegið í golfi á unglingalandsmótinu í gær. Þar lék Kristján Benedikt Sveinsson frá Akureyri á alls 69 höggum en hann lék á rauðum teig. Kristján Benedikt keppti í flokki 11-13 ára og það er aldrei að vita að þarna sé á ferð framtíðarspilari í golfinu.

Kvöldvaka verður í risatjaldinu á tjaldsvæðinu í kvöld og koma þar fram þekktir tónlistamenn. Mótið heldur áfram á morgun en því líkur síðan með veglegri flugeldasýningu á miðnætti annað kvöld," segir í tilkynningunni.