„Hinu opinbera engin takmörk sett þegar kemur að sköttum“

Aflahæstu strandveiðibátar landsins í sumar lönduðu afla að verðmæti um 8,6 milljóna króna hver á tímabilinu. Formaður Landssambands smábátaeigenda segir afar misjafnt hve stóran hlut af verðmætinu sjómennirnir fái í sinn hlut.

Meðalverð á öllum handfæraafla í sumar var 288 kr. pr. kg. samkvæmt upplýsingum frá Reiknistofu fiskmarkaða. Hér er miðað við þá tölu þó samsetning afla geti verið misjöfn og meðal verðið spannað frá 260 kr. upp í 320 kr.

Aflahæstu bátarnir voru með um og yfir 30 tonn. Miðað við meðalverðið eru 30 tonn 8,64 milljóna króna virði.

Arthur Bogason, formaður Landssambands Smábátaeigenda, segir misjafnt hve hátt hlutfall af þessum upphæðum rennur til sjómannanna. „Sumir eiga bátana sína skuldlausa. Sumir eiga þá í algerri skuld," segir hann. Af þvíleiðir að einhverjir sjómenn borga sér engin laun meðan þeir láta bátinn borga sig upp meðan aðrir borga sér góð laun. Hann segir algengast að strandveiðimenn fari einir á hverjum bát í róðra.

Arthur minnir einnig á að strandveiðimenn greiði margs konar opinber gjöld og því rennur verðmæti aflans ekki óskipt til þeirra. „Þeir borga auðlindagjald, tæpar 10 kr. á kílóið. Svo borga þeir hafnargjöld. Auk þess ýmiss konar þjónustugjöld sem geta verið 7% af aflaverðmæti. Og margt fleira," segir hann. „Hinu opinbera eru engin takmörk sett þegar kemur að opinberum gjöldum og sköttum.“