Bætur fyrir að renna í hálku

Starfsmaður Skattstofu Suðurlands fékk í dag dæmdar bætur vegna þess hún datt í hálku í tröppum við inngang Skattstofunnar. Íslenska ríkið hélt því fram að slysið væri óhappatilviljun.

Starfsmaðurinn var á leið í hádegismat þegar hún datt í tröppum við inngang Skattstofunnar þann 16. janúar árið 2009. Hún valt niður tröppurnar, lenti á mjöðminni og hlaut við það samfallsbrot á hrygg.

Héraðsdómur Reykjavíkur dæmdi henni í dag bætur þar sem telja yrði að aðstæður við innganginn hefðu verið óöruggar. Þrepin hafi verið varhugaverð og steinhellur í þeim hafi legið á mis. Vegna vanbúnaðar hafi hálka myndast á þrepunum og þau orðið hættuleg.

Ríkið var því dæmt skaðabótaskylt vegna slyssins.