Seifur er horfinn - frúin er miður sín

„Mig langar til þess að hvetja hvern þann sem veit um fuglinn eða hefur hann undir höndum að koma honum til skila," segir Jóhanna Björk Halldórsdóttir, eigandi páfagauksins Seifs sem hvarf aðfaranótt 17. júní, en talið er öruggt að einhver hafi tekinn hann ófrjálsri hendi. Hann er búsettur í dýragarðinum Slakka í Laugarási, skammt frá Skálholti, þaðan sem hann hvarf um helgina.

Seifur er af gerðinni Green-winged Macaw. Hann er stór og myndarlegur. Fuglarnir ná háum aldri en að sögn Jóhönnu geta þeir lifað í 80 ár. Þá finna þeir sér maka sem þeir svo eyða ævinni með. Þannig hefur Jóhanna töluverðar áhyggjur af frúnni, „hún bíður hans og er orðin mjög leið," segir Jóhanna um hina ástföngnu fugla sem hafa verið aðskildir með svo harmrænum hætti.

Jóhanna segist þegar hafa tilkynnt hvarf Seifs til lögreglunnar á Selfossi en hún segist fullviss um að einhver hafi tekið páfagaukinn. Fuglarnir eru orðnir tólf ára gamlir, „þeir eiga því góð 60 til 70 ár eftir," segir Jóhanna sem vonast til þess að sá sem tók Seif sjái aumur á þessu ástfangna pari og sameini þau á ný.