Um 1000 ungmenni mættu til vinnu

Um 1000 ungmenni á aldrinum 15 til 16 ára mættu til vinnu í blíðskaparveðri víðs vegar um borgina í dag, en nú er fyrsti starfsdagur Vinnuskóla Reykjavíkur. Alls hafa rúmlega 1500 nemendur verið skráðir til vinnu en þeir munu flestir sinna hefðbundnum garðyrkjustörfum í sumar.

Um 100 leiðbeinendur og aðstoðarleiðbeinendur voru ráðnir til starfa og sátu í síðustu viku ýmis námskeið til að búa þá undir starfið með nemendunum. Að auki hafa rúmlega 20 manns unnið að margvíslegum undirbúningi frá miðjum maí, starfsfólk á skrifstofu og þjónustumiðstöð Vinnuskólans auk yfirleiðbeinenda og fræðsluleiðbeinenda.

Allir nemendur úr 9. og 10. bekkjum grunnskóla í Reykjavík eiga kost á starfi í Vinnuskólanum í þrjár vikur á öðru tveggja starfstímabila: 11.-29. júní eða 2.-20. júlí. Foreldrar þeirra skrá þá til vinnu í gegnum Rafræna Reykjavík og enn er opið fyrir skráningar.