Vilja heimild til þess að fylgjast með búsetu kynferðisafbrotamanna

Barnaverndarstofa vill fá heimild til að fylgjast með búsetu hættulegra kynferðisafbrotamanna eftir að afplánun lýkur. Stofnunin geti þá sett sig í samband við skólayfirvöld ef lögheimili þeirra er nálægt skólalóð.

Barnaverndarstofa hefur talið mikilvægt að koma upp skilvirku eftirliti með hættulegum kynferðisbrotamönnum eftir að afplánun lýkur. Þannig megi koma í veg fyrir að þeir brjóti af sér aftur.

Heiða Björg Pálmadóttir, lögfræðingur Barnaverndarstofu, segir að nauðsynlegt að kynferðisbrotamönnum verði gert skylt að fara í sérstakt sálfræðimat.

„Og út frá þeim greiningum er svo hægt að meta hvort það sé ástæða til að fylgjast með þeim eftir að afplánun lýkur," segir Heiða.

Hættulegum kynferðisbrotamönnum verði þá ennfremur gert skylt að tilkynna lögheimili sitt til stofnunarinnar sem síðan gæti brugðist við - til dæmis ef mennirnir búa í nálægð við skóla.

„Þá gætum við í fyrsta lagi látið barnaverndanefndina vita í því lögheimili sem að viðkomandi er, barnaverndarnefndin metur þá í rauninni hvar eru hætturnar, er ástæða til þess að láta aðra vita, barnaverndarnefndin með samþykki Barnaverndarstofu, getur þá látið þá aðila í nærsamfélaginu vita sem er talið nauðsynlegt eins og t.d. leikskóli, ef viðkomandi byggi nálægt slíkum stað."

Innanríkisráðráðuneytið hefur nú til endurskoðunar þau lagaúrræði sem snúa að eftirliti með kynferðisbrotamönnum að lokinni afplánun. Von er á frumvarpi þessa efnis í haust en ráðherra hefur lýst því yfir að hann vilji stíga varlega til jarðar í málinu.

Heiða segir að ekki sé um marga einstaklinga að ræða og því ætti eftirlit að vera auðvelt.

„Það er mikilvægt að við náum utanum þessa örfáu einstaklinga og reynum að fylgjast með þeim svo þeir brjóti ekki af sér aftur," segir Heiða.