Hreyfing á Helguvík - álverinu tryggð rafskaut

Hreyfing er á viðræðum um álverið í Helguvík og gæti fengist úr því skorið fyrir lok mánaðarins hvort framkvæmdir fari á fullt upp úr áramótum. Eigandi Norðuráls, Century, tilkynnti í dag um kaup á rafskautaverksmiðju í Hollandi sem annar bæði Grundartanga og nýju álveri í Helguvík.

Í tilkynningu Century Aluminum um kaup á hollensku verksmiðjunni kemur fram að ekki aðeins tryggi hún rafskaut til álvers Norðuráls á Grundartanga heldur gæti hún einnig annað þörfum nýs álvers í Helguvík fyrir rafskaut. Þannig virðast kaupin lýsa bjartsýni um að álframleiðsla hefjist í Helguvík en þar er nánast aðeins búið að reisa grind að álveri.

Þótt hálft ár sé brátt liðið frá því gerðardómur féll í deilumáli um orkusamning hefur lítið frést af viðræðum Norðuráls og HS Orku og ráðamenn beggja félaga eru varkárir í yfirlýsingum um stöðuna. Stjórnarformaður HS Orku, Ásgeir Margeirsson, sagði í dag að markmiðið væri að reyna að ná þessu saman, unnið væri samkvæmt því, og kvaðst ekki vilja vekja falsvonir með því að segja meira né nefna tímasetningar. Forstjóri Norðuráls, Ragnar Guðmundsson, sagði að áfram væri unnið að málinu með öllum samningsaðilum, en vildi heldur ekki leggja mat á stöðu viðræðna.

Heimildir fréttastofu herma að málið hafi þokast áfram undanfarnar vikur. Taldar eru líkur á að fyrir lok þessa mánaðar hafi staðan skýrst nægilega vel til að unnt verði að taka ákvörðun um að setja undirbúning á fulla ferð með það að markmiði að framkvæmdir hefjist upp úr næstu áramótum. Þær yrðu ekki aðeins við álverið í Helguvík heldur einnig hjá HS Orku við stækkun Reykjanesvirkjunar og hjá Orkuveitu Reykjavíkur við Hverahlíðarvirkjun.

Viðræður miða við að tryggja orku fyrir 180 þúsund tonna álver og gangi þær áætlanir eftir gæti fyrsti áfanginn, 90 þúsund tonn, komið í rekstur í ársbyrjun 2015.