Björn Valur: Planið að eyðileggja sem mest

Þingflokksformaður Vinstri grænna segir að ekki komi til greina að draga veiðigjaldafrumvarpið til baka til þess að flýta fyrir þingstörfum. Hann gagnrýnir stjórnarandstöðuna fyrir ólýðræðisleg vinnubrögð.

Engin sátt liggur fyrir á Alþingi um framhald þingstarfa en upphaflega stóð til að ljúka þingstörfum í lok maí.

Önnur umræða um veiðgjaldafrumvarpið hefur nú staðið yfir í rúmar sextíu klukkustundir en Ásta Ragnheiður Jóhannesdóttir, forseti Alþingis, tók málið af dagskrá í dag til að gefa þingflokksformönnum ráðrúm til að komast að samkomulagi í málinu. Sjálfstæðismenn hafa kallað eftir því að frumvarpinu verði frestað fram á haust.

Kemur til greina af ykkar hálfu að fresta þessu frumvarpi um veiðigjöld til að ná einhverri sátt um framhald þingstarfa?

„Nei það hefur ekki komið til greina af okkar hálfu að henda því til baka útaf þinginu. Þetta er eitt af þeim málum sem snertir fjárlög íslenska ríkisins á yfirstandandi ári og það er einfaldlega sanngjarnt og eðlilegt að þingið fái að taka ákvörðun um slík mál," Björn Valur Gíslason, þingflokksformaður Vinstri grænna.

Björn segir að mörg mál séu komast í uppnám vegna þeirra tafa sem hafa orðið á þingstörfum meðal annars frumvarp um fjármögnun Vaðlaheiðarganga.

„Ég nefni samgönguáætlun bæði til 4 ára og 12 ára sem þingið verður að afgreiða svo að nú hægt sé að horfa fram í tímann og fara bjóða út verk og svo framvegis svo að það er fullt af málum hér sem er verið að stöðva í þinginu og það virðist vera planið hjá stjórnarandstöðunni að stöðva öll mál og eyðileggja sem mest." sagði Björn Valur.