Göngin pikkföst í þinginu en tilboðið að renna út

Tilboð í gerð Vaðlaheiðarganga, sem lagt var fram fyrir átta mánuðum, rennur út á fimmtudag, og hefur Vegagerðin nú í annað sinn neyðst til að fara þess á leit við lægstbjóðendur að þeir framlengi tilboð sitt.

Tilboðin voru opnuð í október í haust og áttu ÍAV og Marti lægsta boð, upp á 8,9 milljarða króna og vonaðist fulltrúi verktakanna til að geta hafið framkvæmdir fljótlega eftir áramót. Sú von rættist ekki, efasemdir voru á Alþingi um að veggjöld stæðu undir verkefninu, og síðan hefur málið velkst fram og til baka milli ríkisstjórnar og þingsins.

Þrátt fyrir að Steingrímur J. Sigfússon, þáverandi fjármálaráðherra, fengi í nóvember heimild á fjáraukalögum til að ganga frá samningum um Vaðlaheiðargöng treysti hann sér ekki til að ljúka málinu þá í andstöðu við marga stjórnarþingmenn, þeirra á meðal áhrifamenn úr eigin flokki, eins og Ögmund Jónasson, ráðherra vegamála.

Úr varð að nýr fjármálaráðherra, Oddný Harðardóttir, flutti í mars sérstakt stjórnarfrumvarp um heimild ríkissjóðs til að lána fyrir göngunum, en undanfarnar þrjár vikur hefur málið setið fast í annarri umræðu og ekki komist á dagskrá. Á meðan bíða Vegagerðin og verktakarnir, sem og Norðlendingar, í óvissu.

Tilboðið gilti upphaflega til 15. febrúar en þá samþykku ÍAV og Marti að framlengja það til 15. júní, og nú hefur Vegagerðin farið fram á aðra framlengingu. Óvíst er hverju verktakarnir svara núna.