Ármann með 1,5 milljón á mánuði - launin bara hækkað um 4,4%

Ármann Kr. Ólafsson, bæjarstjóri í Kópavogi, segir að heildalaun bæjarstjóra hafi hækkað um 4,4 prósent frá 1. febrúar árið 2009. Týr, félag ungra sjálfstæðismanna í Kópavogi, gagnrýndu Ármann í dag fyrir þau ummæli sín að 23 prósent hækkun á eigin launum og launum bæjarfulltrúa sé ekki launa hækkun heldur leiðrétting.

Ármann sendi frá sér yfirlýsingu í kvöld þar sem hann segir að grunnlaun bæjarstjóri hafi hækkað um 3,5 prósent 1. mars síðastliðinn samkvæmt ákvörðun kjararáðs.

„Bæjarráð Kópavogs ákvað í apríl síðastliðnum að draga til baka 10% launalækkun bæjarfulltrúa frá 1. janúar 2009 og tengja launin við þingfararkaup á nákvæmlega sama hátt og áður. Laun bæjarfulltrúa höfðu staðið í stað frá þeim tíma en í millitíðinni hafði þingfararkaup hækkað um 17%," segir Ármann í yfirlýsingunni.

„Laun bæjarfulltrúa eru því nú 27% af þingfararkaupi eins og áður. Það þýðir í krónum talið að laun fyrir setu í bæjarstjórn urðu frá og með 1. mars 164.752 krónur á mánuði en voru 133.928 krónur eftir að tíu prósenta lækkunin tók gildi fyrir rúmum þremur árum.

Áður höfðu gengið til baka launalækkanir stjórnenda bæjarins en laun þeirra sem voru með yfir 500 þúsund krónur á mánuði voru lækkuð í maí 2009 um 5 til 10%. Þetta þýðir með öðrum orðum að laun bæjarfulltrúa í Kópavogi voru fyrst til að lækka eftir hrun og síðust til að ganga til baka eftir hrun.

Grunnlaun bæjarstjóra Kópavogs voru 1. júní 1.127.821 króna ef með er talinn bifreiðastyrkur en þau hækkuðu um 3,5%, eins og áður sagði, samkvæmt ákvörðun kjararáðs þann 1. mars 2012. Þess má geta að grunnlaun bæjarstjóra Kópavogs voru 1. febrúar 2009 1.070.624 krónur.

Auk bæjarstjóralauna fær bæjarstjóri Kópavogs, samkvæmt venju, greitt fyrir setu í bæjarráði, bæjarstjórn og hafnarstjórn og eru heildarlaunin þegar það er talið með því 1.496.988 krónur. Samtals hafa því heildarlaunin hækkað um 4,4 % samanborið við laun bæjarstjóra 1. febrúar 2009," segir jafnframt í yfirlýsingunni.