Kona hætt komin er bíll hennar valt á hvolf ofan í Fnjóská

Kona á fimmtugsaldri, sem var ein i bíl sínum, var hætt komin þegar hún missti bíl sinn út af þjóðveginum við Dalsmynni í Fnjóskadal, austan við Akureyri upp úr klukkan eitt í nótt, og bíllinn valt á hvolf ofan í Fnjóská.

Bíllinn fylltist brátt af köldu straumvatninu, en konunni tókst að losa sig úr bílbeltinu, sem hún hékk í, komast út úr bílnum og ganga rúman kílómetra að næsta bæ. Þá var hún orðin mjög köld og hrakin og var auk þess meidd, meðal annars rifbeinsbrotin.

Heimafólk hlúði þegar að henni og kallaði eftir sjúkrabíl, sem flutti hana á sjúkrahúsið á Akureyri, þar sem hún naut aðhlynningar og er enn til frekari rannsókna.