„Alþingi er í miklum vanda“

„Alþingi er í miklum vanda," sagði Steingrímur J. Sigfússon á Alþingi í dag. Minnihlutinn á Alþingi hefði lagst gegn mikilvægum málum með málþófi og komið í veg fyrir afgreiðslu þeirra.

Steingrímur sagði það mjög umhugsunarverðan skilning á grundvallarreglum lýðræðisins að minnihlutinn á þingi teldi sér fært að bjóða meirihlutanum hvaða þingmál fengju afgreiðslu eða krefjast þess að fá að ráða t.d. fjárhæð veiðigjalda.

Venjulega ætti meirihlutinn að gera tilboð. Nú hefði hins vegar mikið verið reynt til að ná samkomulagi um þinglok við minnihlutann, ríkisstjórnin hefði jafnvel lagt til að leggja til hliðar tvö mál af þremur sem eru stjórninni mikilvæg til að ná samkomulagi.

„Þetta hef ég aldrei áður upplifað í tæplega þrjátíu ára þingsögu," sagði Steingrímur og benti á að venjan væri sú að 50-70 mál væru afgreidd á vorþingum á síðustu tveimur vikum þingstarfa.

Það er rétt að minnihlutinn er að reyna að beita sínum áhrifum á innihald mála og það er ekkert óvanalegt við það, sagði Einar K. Guðfinnsson og vísaði því algerlega á bug að minnihlutinn héldi þinginu í gíslingu.

Rætt var um störf þingsins á Alþingi í morgun.