Stal hugmyndinni frá Obama

Forsetaframbjóðandinn Ari Trausti Guðmundsson ætlar að vera með kosningaskrifstofu á hjólum að hætti Obama bandaríkjaforseta. Hann segist eiga mikið fylgi inni á lokasprettinum.

Ari Trausti bauð í þjóðhátíðarkaffi á Laugaveginum í dag en næstu tvær vikur fram að kosningum ætlar hann að vera með kosningaskrifstofu á hjólum.

„Og það virkar þannig að við fáum lánaðan stóran trukk, einn af stærstu húsvögnum á Íslandi og förum með hann á staði, þetta er tilraun til að gera þetta öðruvísi og síðast en ekki síst ódýrt," segir Ari Trausti.

Hvaðan kom þessi hugmynd?

„Hún er nú að einhverju leyti stolin frá Bandaríkjunum, frá Obama."

Hann segir þetta góða leið til að ná til fólks til dæmis við matvöruverslanir og á öðrum fjölförum stöðum frekar en að bíða eftir að það komi til sín. Núna þegar tæpar tvær vikur eru til kosninga finnst Ara baráttan hafa gengið vel.

„Og ég hef núna séð það að fylgið er að stíga hægt og rólega upp og ég á von á að það gerist núna hraðar. Stóra málið er að sannfæra fólk um það að þessi valkostur er raunverulegur en ekki bara að flækjast fyrir hinum."

Hann segir þriðjung kjósenda enn óákveðinn í skoðanakönnunum og enn séu stórir umræðuþættir eftir.