Vesalingarnir með flestar tilnefningar til Grímunnar

Gríman tilkynnti tilnefningar til íslensku leiklistarverðlaunanna í gær. Það var stórsýningin Vesalingarnir sem hlaut flestar tilnefningar eða alls níu.

Alls komu 89 sviðslistaverkefni til álita í ár til að hljóta hina eftirsóttu Grímu. Þar af voru 23 danssýningar, 9 barnasýningar og 7 útvarpsverk. Verðlaunin eru veitt í nítján verðlaunaflokkum.

Það var söngleikurinn Veslingarnir sem fékk flestar tilnefningarnar í ár, eða níu alls í átta flokkum. Meðal annars var verkið, sem er unnið upp úr samnefndri skáldsögu franska rithöfundarins Victors Hugo, tilnefnt sem leiksýning ársins.

Þjóðleikhúsið getur vel við unað, en Afmælisveislan eftir breska nóbelskáldið Harold Pinter, og var sýnt í Þjóðleikhúsinu í vor, hlaut næst flestar tilnefningar til Grímunnar í ár, eða alls sjö. Leikritið Tengdó, sem sýnt var í Borgarleikhúsinu, fékk fimm tilnefningar.

Í ár var svo tekinn upp nýr verðlaunaflokkur, Sprotinn, sem veittur er fyrir "frumleika og framúrskarandi nýbreytni" á leikárinu. Þar er finna leikverk eftir sjálfstæða leikhópa. Þar á meðal er sýningin, Sýning ársins, eftir sextán elskendur. En sú sýning hlaut einnig tilnefningu fyrir leikskáld ársins. Sýningin vakti töluverða athygli fyrr á árinu, en hún var unnin upp úr könnun félagsvísindadeildar háskóla íslands.

Grímuhátíðin verður haldin í tíunda sinn í Hörpu hinn 14. júní næstkomandi. Hátíðin verður í beinni útsendingu á Stöð 2.