Skipin verða í höfn í viku - vilja breiða sátt um kvótafrumvörp

„Við erum að tala um að nota næstu viku til þess að fara yfir stöðu málsins með starfsmönnum útgerðanna og fleiri aðilum sem málið varðar," segir Friðrik J. Arngrímsson, framkvæmdastjóri Landssambands íslenskra útvegsmanna (LÍÚ) en nær allur skipafloti Íslands mun ekki halda til veiða á mánudaginn í mótmælaskyni við frumvörp ríkisstjórnarinnar um stjórn fiskveiða og veiðigjöld og eru til meðferðar á Alþingi núna.

Öll aðildarfélög LÍÚ hafa ákveðið að beina því til félagsmanna sinna að halda ekki til veiða á mánudaginn, er því óhætt að segja að nær allur skipafloti Íslands muni liggja í höfn að minnsta kosti út vikuna.

Friðrik bendir á að um tímabundna aðgerð sér að ræða. „Það stefnir í að skipin verða í landi í næstu viku í þetta skiptið," segir Friðrik sem útilokar ekki lengri mótmæli síðar, án þess að nokkur ákvörðun hafi verið tekin um það að svo komnu máli.

Friðrik segir að útvegsmenn séu afar ósáttir við frumvörp ríkisstjórnarinnar enda muni þau hafa mjög alvarleg áhrif á íslenskan sjávarútveg eins og fram komi í fjölmörgum umsögnum um þau.

Spurður hvort aðgerðin hafi ekki mikil áhrif á önnur fyrirtæki og valdi töluverðu raski svarar Friðrik því til að þarna sé um heilmikla aðgerða að ræða.

Friðrik segir að ekkert samtal sé á milli LÍÚ og ríkisstjórnarinnar. Spurður hvað útvegsmenn vilji fá út úr aðgerðunum svarar Friðrik: „Við vonumst til þess að það verði sest niður og stjórnvöld setji vinnu af stað með okkur, stjórnarandstöðunni, sveitarfélögunum og fleirum sem málið varðar með beinum hætti og það verði fundin lausn á málinu sem búið verður við."