Þrýst á sjómenn að taka þátt í mótmælaaðgerðum

Útvegsmenn beita sjómönnum fyrir sig í kvótadeilunni og þrýst er á suma þeirra að taka þátt í mótmælaaðgerðum. Þetta segir formaður Sjómannasambands Íslands. Útgerðarmenn hafna þessu.

Nær allur fiskiskipaflotinn hefur verið bundinn við bryggju síðan um helgina þegar útgerðarmenn stöðvuðu veiðar í mótmælaskyni við kvótafrumvörpin. Á morgun á svo að sigla tugum skipa til Reykjavíkur vegna útifundar sem haldinn verður.

„Þar sem að koma þá saman útvegsmenn og starfsfólk í sjávarútvegi bæði sjómenn og aðrir. Það er svona lokapunkturinn núna í þessu ákalli til stjórnvalda um að hlusta á þær athugasemdir sem að hafa komið fram frá fjölda aðila og sérfræðingum varðandi fiskveiðistjórnunarfrumvörpin og að það verði vandað til verka," segir Friðrik J. Arngrímsson, framkvæmdastjóri LÍÚ.

Formaður Sjómannasambands Íslands segir félagið sammála gagnrýni útgerðarmanna á kvótafrumvörpin að miklu leyti. Vegna kjaradeilu sinnar og útgerðarmanna ætli það hins vegar ekki að taka þátt í aðgerðunum á morgun.

Í ljósi þessa sé óeðlilegt að félagsmenn þeirra hafi verið boðaðir á sjó til að sigla skipunum til Reykjavíkur vegna fundarins.

„Ef að einhver sambönd, hvort sem það er LÍÚ eða Sjómannasambandið, ákveða að fara í aðgerðir þá eiga þeir að gera það sjálfir á sínum forsendum en ekki beita öðrum fyrir sig sem mér finnst þeir vera að gera," segir Sævar Gunnarsson, formaður Sjómannasambands Íslands.

Sævar segir suma þeirra finna fyrir þrýstingi á að taka þátt í aðgerðunum.

„Þeir segja að þeim hafi nánast verið uppálagt að mæta. Þetta sé bara skyldumæting."

Útgerðarmenn standi ekki rétt að málum.

„Þetta er óeðlileg aðferðafræði og ég efast um lýðræðið í þessu ef menn beita atvinnurekendavaldinu til að fá menn til þess að mæta á útifundi sem þeir eru að boða til."

Útgerðarmenn hafna því að þrýst sé á sjómenn að taka þátt í mótmælunum og bendir á að áhafnir margra skipa hafi lýst yfir stuðningi við aðgerðirnar.

„Ég skora bara á sjómenn að það séu einhverjir sem virkilega vilja taka þátt í þessu fari þarna en aðrir ekki," segir Friðrik.