Ungmenni tóku út refsinguna með því að hreinsa rusl

Það er óhætt að segja að sveitastjórn Svalbarðarstrandshrepps séu ekki refsiglöð stjórn. Þannig var það sveitarstjórinn sjálfur, Jón Hrói Finnsson, sem kallaði á lögregluna aðfaranótt síðasta laugardags, eftir að þrjú ungmenni brutust inn í sundlaugina á Svalbarðseyri. Í frétt vikublaðsins Akureyri kemur fram að lögreglan hafi handtekið ungmennin eftir dálítið uppþot.

Sveitarstjórinn stakk síðan upp á því við lögreglu að í staðinn fyrir að kæra ungmenninn fyrir innbrotið og þeim gerð fjárkrafa vegna kostnaðar við hreinsun á heitum potti, þá gæfist þeim kostur á því að ljúka málinu með því að mæta til vinnu morguninn eftir og hreinsa rusl utanhúss þar sem umhverfisvika stóð yfir hjá sveitarfélaginu.

Og það stóð ekki á ungmennunum sem mættu klukkan tíu morguninn eftir, að vísu heldur illa sofin, en þau slógu ekki slöku við í hreinsunarstarfinu samkvæmt vikublaðinu.

„Þau stóðu sig með mikilli prýði," sagði sveitarstjórinn Jón Hrói í viðtali við vikublaðið Akureyri. „Það hefði verið vont fyrir okkur að láta brotið óátalið, afleiðing þarf að fylgja broti, en mér fannst þetta betri kostur en að gera fjárkröfu og krakkarnir nýttu tækifærið vel."

Hægt er að lesa meira um málið hér.