Framsóknarmenn um borð í Fjölni frá Grindavík

„Það er þungt í þeim hljóðið," sagði þingflokksformaður Framsóknarflokksins sem er nú um borð í línubátnum Fjölni SU frá Grindavík ásamt flokkbróður sínum Sigmundi Davíð Gunnlaugssyni, formanns Framsóknarflokksins.

Þingmennirnir segjast vera að kanna hug sjómanna og nýttu sér nálægð skipanna sem hafa fyllt Reykjavíkurhöfn í morgun og kíktu í heimsókn. Áhöfnin tók vel á móti þingmönnunum og buðu upp á kaffi og með því. „Og nú erum við bara að sjá hvernig fjármunirnir verða til," sagði Gunnar Bragi sem var að skoða skipið ásamt áhöfn.

Eins og greint hefur verið frá þá eru allt í allt um hundrað skip og minni bátar í Reykjavíkurhöfn vegna mótmæla sem verða á Austurvelli klukkan fjögur í dag. Þau eru endapunkturinn á kröftugum mótmælum LÍÚ sem hafa staðið yfir síðan síðustu helgi.

Gunnar Bragi segir í samtali við Vísi að hljóðið sé þungt í sjómönnunum á Fjölni, „en það er baráttuhugur," bætir hann við.