Ungar einstæðar mæður í mestum vanda

Foreldrar sem þiggja fjárhagsaðstoð eru í meirihluta ungar, einhleypar konur og algengt er að þær hafi ekki menntað sig að loknum grunnskóla. Þetta eru niðurstöður rannsóknar sem Velferðarsvið Reykjavíkurborgar lét gera um aðstæður barnafjölskyldna í Reykjavík.

Markmið rannsóknarinnar var að bera saman félagslega og efnahagslega stöðu foreldra eftir því hvort tekjur þeirra væru í formi fjárhagsaðstoðar frá Reykjavíkurborg, atvinnuleysisbóta eða launaðrar vinnu á vinnumarkaði. Niðurstöðurnar sýna að aðstæður barna og fjölskylda eru ólíkar eftir þjóðfélagshópum.

Velferðarsvið leggur til að stofnaður verði vinnuhópur með fulltrúum frá Velferðarsviði, skóla- og frístundarsviði, íþrótta- og tómstundarsviði til að auka valdeflingu, félagsauð og jafna lífsgæði barna í borginni.

Fleira kom fram í rannsókninni. Meðal annars:

Börn fólks sem þiggur fjárhagsaðstoð frá Reykjavíkurborg fara oftar í bíó, partý eða boð hjá vinum eða bekknum og taka frekar þátt í starfi félagsmiðstöðvanna en börn Reykvíkinga í launaðri vinnu. Börn borgarbúa sem stunda vinnu eru líklegri til að stunda hreyfingu eða tónlistarnám.

Reykvískir foreldrar sem njóta fjárhagsaðstoðar frá Reykjavíkurborg og foreldrar á atvinnuleysisbótum hitta vini og ættingja oftar en í foreldrar í launaðri vinnu. Þeir geta þó síður reitt sig á aðstoð annarra við heimilishald og uppeldi barna.

Ýmislegt bendir til að samvera foreldra og barna sé meiri í fjölskyldum þar sem forsjáraðili þiggur fjárhagsaðstoð eða atvinnuleysisbætur en í fjölskyldum þar sem a.m.k. annað foreldrið er í launaðri vinnu.