Aukning þorskafla skapar 8 milljarða tekjur

Aukning þorskafla um 19 þúsund tonn á næsta fisveiðiári skapar þjóðinni yfir 8 milljarða í auknum útflutningstekjum. Þorskaflinn stefnir í 250 þúsund tonn á næstu árum segir forstjóri Hafrannsóknarstofnunar.

Hafrannsóknarstofnun leggur til að þorskkvótinn verði aukinn um 19 þúsund tonn í 196 þúsund tonn sem skilar þjóðarbúinu rúmum 8 milljörðum króna í útflutningsverðmæti samkvæmt útreikningum LÍÚ. Þorskstofninn hefur farið stækkandi undanfarin ár eftir að veiðihlutfall var lækkað í tuttugu prósent og hefur hrygningarstofn hans eki verið stærri frá árinu 1964.

„Með þessu áframhaldi og með þeim efnivið sem núna er í stofninum, og mun skila sér inn í veiðina á allra næstu árum, þá munum við sjá það að aflinn mun á næstu árum fara verulega yfir 200 þúsund tonn, við erum jafnvel að tala um 250 þúsund tonn á árið 2016," segir Jóhann Sigurjónsson, forstjóri Hafrannsóknarstofnunnar.

Á móti kemur minnkun á ráðlögðum ýsukvóta um 5 þúsund tonn og þar með 4 milljarða tekjuskerðingu.

Jóhann segir ástand ýsustofnsins vera áhyggjuefni, framundan séu lélegir árgangar og því nauðsynlegt að draga saman veiði svo stofninn fari ekki undir hættumörk.

Aðrar tegundir eru nokkuð stöðugar, ráðlagður ufsakvóti minnkar lítillega, karfi eykst á móti og mjög bjartar horfur eru fyrir síldina þar sem aflahámark er metið í 67 þúsund tonnum og skilar það 7 milljörðum í auknum útflutningstekjum. Framkvæmdastjóri LÍÚ segir vöxt síldarstofnsins mjög jákvæðar fréttir.

„Við vorum búin að byggja þennan stofn úr nánast engu, með því að fara varlega í veiðarnar og vorum komin upp í 150 þúsund tonn þegar við fengum þessa sýkingu, sem er náttúrulega bara náttúrulegt fyrirbæri. Núna erum við að koma aftur til baka þannig það er gríðarlega jákvætt.