Bíræfnir þjófar í Norðlingaholti - leikskólabörn fundu þýfið

Talsverður erill hefur verið hjá lögreglunni á höfuðborgarsvæðinu í dag en um klukkan tíu í morgun var tilkynnt um glæfralegan akstur eftir götu í Mosfellsbæ. Fáeinum mínútum síðar var tilkynnt um bifreiðina stórskemmda fyrir utan veg og tvo menn á hlaupum frá henni. Skömmu síðar kom í ljós að bifreiðinni hafði verið stolið. Mennirnir komust undan.

Þeir voru þó ekki hættir. Því um klukkan ellefu tilkynnti íbúi í Norðlingaholti um menn fyrir utan glugga á íbúð sinni, þar sem þeir ræddu sín á milli að þeir ætluðu að brjótast þar inn. Þeir ætluðu að skríða í gegnum glugga en þegar þeir urðu varir við húsráðanda hættu þeir við og hlupu í burtu. Rétt fyrir klukkan tólf hringdi maðurinn í lögreglu og sagði að mennirnir væru komnir inn í íbúð skammt frá en þar var enginn heima.

Þeir voru handsamaðir inni í íbúðinni og sá þriðji skammt frá. Þetta reyndust vera sömu menn og voru á ferð í Mosfellsbænum. Þeir voru handteknir og vistaðir í fangaklefa.

Íbúi í Norðlingaholti hafði samband við fréttastofu síðdegis í dag og sagði frá því að ljóst væri að mennirnir hefðu brotist inn í fleiri íbúðir á svæðinu. Því krakkar á leikskóla í hverfinu fundu bakpoka með þýfi á sparkvelli skammt frá skólanum. Haft var samband við lögreglu sem kom og sótti bakpokana.