Stærsta kersmiðjan í stærsta álverinu vígð

Síðasta áfanganum í byggingu álvers Alcoa á Reyðarfirði er nú lokið en stærsta kersmiðjan í stærsta álveri á Íslandi var formlega vígð við hátíðlega athöfn í dag.

Vinna hófst við kersmiðjuna á árinu 2010. Á meðan á framkvæmdunum stóð unnu að jafnaði um 70-80 manns við byggingunna en 160 þegar umsvifin voru í hámarki. Sagt er að smiðjan muni skapa aukalega 50-60 störf á Reyðarfirði. Heildarfjárfesting vegna hennar er um 3,5 milljarðar króna.

Kersmiðjan skiptist í þrjá hluta, þ.e. kerfóðrunarbyggingu, kerbrotabyggingu og skrifstofubyggingu. Flatarmál bygginganna er samtals rúmlega fjögur þúsund fermetrar. Ál er framleitt í 336 kerum í álveri Fjarðaáls á Reyðarfirði og þau þarf að endurnýja á 5-7 ára fresti. Í nýju kerfóðrunarbyggingunni verður mögulegt að fóðra þrjú ker í einu. Smiðjan var vígð klukkan þrjú í dag.