Árlegt hlaup til styrktar langveikum börnum

Fjórmenningarnir sem hlupu í kringum landið síðastliðið sumar fyrir Styrktarfélag krabbameinssjúkra barna hafa nú stofnað góðgerðarfélagið Meðan fæturnir bera mig. Markmið með stofnun félagsins er að halda úti árlegu hlaupi í Öskjuhlíðinni þar sem þátttökugjald rennur óskipt til félaga sem veita veikum og fötluðum börnum stuðning. Í ár hefur verið ákveðið að hlaupa fyrir Umhyggju sem er stuðningsfélag langveikra barna og er hlaupið tileinkað þriggja ára hetju, Mirru Wolfram Jörgensdóttur.

Hlaupið er fimm kílómetra hringur í Öskjuhlíðinni og fer það fram laugardaginn 2. júní klukkan 12. Áhugasamir eru hvattir til að skrá sig á hlaup.com fyrir klukkan 12 á föstudag. Þeir sem sjá sér ekki fært að hlaupa geta heitið á hlaupið á hlaup.com ef vilji er fyrir hendi að leggja málefninu lið. Hlaupaáhugafólk er hvatt til þátttöku og eins fjölskyldufólk. Veittir eru verðlaunapeningar fyrir fyrstu sæti í aldursflokki.