Eigandinn gaf sig fram - sá fréttina á Vísi

„Hann kom hingað í gærkvöldi og sótti vélina. Hann þekkti allar myndirnar í vélinni þannig það var góður endir á þessu," segir Þór Ólafur Ólafsson, staðarhaldari á tjaldsvæðinu Reykjamörk í Hveragerði. Á mánudaginn kom lögreglumaður á frívakt verðmætri myndavél í hendur Þórs en vélina fann hann upp í Reykjadal á sunnudagskvöldið.

Þór hafði samband við fréttastofu á mánudag og auglýsti eftir eigandanum hér á Vísi.is. Það skilaði sér því hann sá fréttina og hafði samband við Þór. „Hann var hérna með einhverjum vinum sínum þegar hann gleymdi vélinni upp í dal. Hann var að fara erlendis í morgun þannig hann kom bara hingað í gærkvöldi. Það er gaman að þetta hafði farsælan endi."

Þór Ólafur býr í Hveragerði og segist hafa vakið mikla athygli á Selfossi síðustu daga. „Þegar ég fór þangað í gær þá voru allir að spyrja mig: Er eigandinn búinn að gefa sig fram? Þetta virkaði heldur betur. Ég vona bara að þegar fólk finnur eitthvað að það reyni allt sem það getur til að koma því í réttar hendur."