Páll Óskar biður Gretu Salóme afsökunar á harðri gagnrýni

Tónlistarmaðurinn Páll Óskar Hjálmtýsson hefur beðið Gretu Salóme Stefánsdóttur, söngvara og höfund Eurovision framlags Íslands í Azerbajdzan, afsökunar á að hafa gagnrýnt hana í viðtali við DV um helgina.

Á Facebook-síðu sinni skrifar Páll Óskar:

„Ég talaði við Gretu Salóme í 3 klukkutíma í gær. Við áttum mjög gott og fróðlegt samtal, og okkur leið báðum betur á eftir. Á laugardaginn, keppnisdaginn sjálfann, spratt upp mjög leiðinleg umræða í netheimum þar sem Gretu Salóme var úthúðað vegna meints aðgerðaleysis í mannréttindamálum.

Ég tók þátt í þessum umræðum, þar sem ég hnaut sérstaklega um orð hennar: „Mannréttindabrot eru ekki hluti af þessari keppni." Þar var ég Gretu Salóme hjartanlega ósammála, og væri það enn þann dag í dag, ef ég væri ekki búinn að ræða við hana persónulega og fá hennar hlið á málinu.

Ég gekk svo langt að segja „Þögn er sama og samþykki" og ýjaði að því að Greta væri þar með að samþykkja mannréttindabrot með því að því líta í hina áttina, og slíku framferði hef ég alltaf verið mótfallinn, og er enn."

Ástæðan fyrir gagnrýni Páls Óskars voru ummæli Gretu Salóme í fréttum Stöðvar 2 á föstudaginn síðasta, daginn fyrir lagakeppnina í Bakú.

Þá var hafður eftir henni hluti af viðtali sem tekið var við hana og birtist í fréttum Stöðvar 2. Orðrétt hljóðuðu ummæli hennar í fréttinni svona:

„Það hefur oft verið tekið fram að þetta sé ekki pólitískur vettvangur og við erum auðvitað bara komin hingað til að taka þátt í lagakeppni og mannréttindabrot eru náttúrulega ekki hluti af þessari keppni."

Páll Óskar telur að þarna hafi orð Eurovison-farans hafi verð tekin úr samhengi.

Þannig skrifar hann á Facebook-síðu sína. „Nú er komið í ljós að orð hennar voru slitin úr samhengi. Það er auðséð þegar viðtalið við hana er lesið í fullri lengd. Þess vegna vil ég biðja Gretu Salóme afsökunar á orðum mínum „Þögn er sama og samþykki", vegna þess að Greta Salóme þagði ekki. Hún svaraði spurningum blaðamanns af hjartans sannfæringu og eftir bestu vitund. Mér þykir það miður að hafa tekið þátt í þessari geðshræringu sem myndaðist í kjölfar þessa fréttaflutnings og vona að Greta sjálf geti fyrirgefið mér á móti."

Ekki er nákvæmlega ljóst hvað breytti afstöðu Páls Óskars þar sem ekki náðist í hann við vinnslu fréttarinnar, en Greta Salome sagði sannarlega að mannréttindabrot væru ekki hluti af þessari keppni, líkt og Páll Óskar fordæmdi í upphafi. Þá er ljóst að hvorki hún, né allir keppendur Eurovision, utan hina sænsku Loreen, sýndu mannréttindasinnum í Bakú stuðning í verki.

Hitt er þó að hún svarar fréttamanni sannarlega af bestu vitund í viðtalinu aðspurð um mannréttindabrotin í Bakú. Meðal annars dregur hún í efa að sænska söngkonan Loreen, sú sama og sigraði Eurovision-keppnina, hafi látið sig mannréttindi varða þegar hún heimsótti mannréttindaskrifstofu í borginni, en hún var harðlega gagnrýnd fyrir uppátækið af yfirvöldum þar í landi.

Þá bætir Greta Salóme við í lok viðtalsins: „Mannréttindabrot eru einfaldlega ekki hluti af þessari keppni. Við erum bara komin hingað til að gera okkar besta í keppninni."

Þess má geta að íslenska framlagið hafnaði í 19. sæti af þeim 26 löndum sem tóku þátt í Eurovision á úrslitakvöldinu.

Í ljósi umdeildra ummæla Gretu birti Vísir samtal fréttamannsins í heild sinni svo allra sanngirni sé gætt. Það má lesa hér.

Ummæli Páls Óskars má lesa í heild sinni hér.