Bjarni gæti stutt tillögu um afturköllun aðildarumsóknar

Bjarni Benediktsson, formaður Sjálfstæðisflokksins, útilokar ekki að hann styðji þingsályktunartillögu þess efnis að draga aftur aðildarumsókn Íslands að ESB. Hann hefði þó frekar viljað að þingmenn sem vilja þjóðaratkvæðagreiðslu um áframhaldandi aðildarviðræður sneru bökum saman og ákvæðu sameiginlegar aðgerðir í málinu.

Bjarni telur marga þingmenn á þessari skoðun, jafnt stjórnarliða sem aðra. Hann telur ástæðu þess að stjórnarliðar beiti sér ekki í málinu vera að þeir hætti ekki á að „raska heimilisfriðnum á stjórnarheimilinu."

Bjarni hefur enn ekki kynnt sér efni tillögunnar og getur því ekki beinlínis tekið afstöðu með eða á móti henni.

Þingmennirnir Jón Bjarnson og Atli Gíslason lögðu tillöguna fram á Alþingi í gær. Þó ekki sé langur tími til að ræða málið, enda stutt í sumarfrí á þingi, telur Bjarni tillöguna engu að síður setta fram í fullri alvöru. „Ég tel að hugur fylgi máli."