Guðgeir fyrir dómi: "Ég er skaðvaldur“

„Ég er ekki viss hvort ég ætlaði að drepa neinn," sagði Guðgeir Guðmundsson fyrir dómara Héraðsdóms Reykjavíkur í morgun þegar hann var inntur eftir afstöðu til sakarefna gegn sér. Guðgeir er ákærður fyrir að stinga Skúla Eggert Sigurz, framkvæmdastjóra Lagastoða, fimm sinnum með veiðihníf, þar af voru fjórar stungur lífshættulegar.

Eins og fram kom í þingfestingu málsins var árásin svo alvarleg að Skúli missti 50 lítra af blóði eftir árásina og á meðan aðgerð lækna stóð yfir. Þeim tókst að bjarga lífi hans, með naumindum.

Þó Guðgeir sé ekki viss hvort hann hafi ætla að bana Skúla bætti hann þó við: „Ég er skaðvaldur í málinu."

Þannig játaði hann verknaðinn en hefur þó uppi sjónarmið uppi um árásina, það er hvort þarna hafi verið tilraun til manndráps að ræða. Þegar dómari spurði Guðgeir hvort hann játaði að hafa stungið Guðna Bergs lögfræðings þegar hann kom Skúla til bjargar daginn örlagaríka, svaraði Guðgeir: „Ég bara man ekkert eftir því, en mjög líklega já."

Hann dregur því ekki í efa að hann hafi stungið Guðna tvívegis í lærið. Skúli fer fram á þrjár milljónir króna í miskabætur á meðan Guðni krefst milljón af Guðgeiri. Þeim kröfum hafnaði hann alfarið fyrir dómi.

Ekki tókst að finna dagsetningu fyrir aðalmeðferð málsins í þinghaldinu, en gera má ráð fyrir því að réttað verði yfir Guðgeiri í júní.