Háskólanemar vilja hjólaleigustöðvar víðsvegar um borgina

Reykjavíkurborg er tilbúin að veita nokkrum háskólanemum leyfi til að koma sjö hjólaleigustöðvum fyrir víðsvegar um borgina.

Nokkrir nemendur við Háskólann í Reykjavík unnu að verkefni í nýsköpunaráfanga í vor þar sem markmiðið var að meta hvort að hjólaleiga, líkt og er til staðar í mörgum stórborgum, væri raunhæfur möguleiki hér á landi.

„Þetta ætti algjörlega að vera raunhæft. Með sextíu milljónir í upphafskostnað væri hægt að setja upp stöðvarnar með um það bil 70 hjólum á sjö stöðum," segir Þorgeir Sveinsson, nemandi í heilsuverkfræði. Hópurinn sér fyrir sér stöðvar í Nauthólsvík, við Hlemm, Háskóla Íslands, BSÍ, Kringluna og á Ingólfstorgi. Rekstrarkostnaðurinn við leiguna myndi vera breytilegur en hann gæti hljóðaða upp á þrjúhundruð þúsund krónur á mánuði til að byrjar með.

„Ef við myndum selja 2000 árskort þá værum við í ellefu milljón króna hagnaði á ári miðað við að kortið kosti 8000 kr."

Og þau búast einnig við að hægt verði að fá auglýsingatekjur af hjólunum.

„Það eru miklir auglýsingamöguleikar á hjólunum, enda er þetta auglýsing sem ferðast um og hollur og grænn kostur. Þannig að þetta er mjög jákvæður kostur í rauninni," segir Þorgeir.

Hópurinn hefur átt fund með fulltrúum umhverfis- og samgönguráðs borgarinnar.

„Þeim leist mjög vel á þetta og voru tilbúnir til að gefa leyfi fyrir staðsetningu á stöndunum. Það sem okkur vantar helst er þessi upphafskostnaður sem er svolítið erfitt þar sem við erum öll í fullu námi. En um leið og við fáum einhvern með okkur í þetta þá væri þetta ekkert mál."