Ættleiðingaráform í uppnámi: "Við fáum engin svör"

Ungt par sem er í óvissu með ættleiðingarmál sitt hér á landi íhugar að leita út fyrir landsteinana til að láta draum sinn rætast þrátt fyrir mikinn aukakostnað og umstang. Óvissan sé hræðileg og engin svör berist frá innanríkisráðherra.

Ættleiðingarmál fjölda Íslendinga eru í biðstöðu vegna fjárskorts Íslenskrar ættleiðingar, eina ættleiðingarfélags landsins. Það hefur nú þegar gengið á varasjóð sinn og býst við að leggja upp laupana í haust ef ríkið tryggir því ekki aukin fjárframlög.

Þetta þýðir að ættleiðingarferli um hundrað fjölskyldna eru í hættu þar á meðal Líneyjar og Hafþórs sem ákváðu að fara þessa leið fyrir ári eftir að hafa reynt við glasa- og tæknifrjóvganir án árangurs.

„Eftir alla þessa vinnu þá erum við stopp og möguleiki á að við getum ekki gengið frá þessu mál," segir Líney Jóhannesdóttir, verðandi kjörforeldri.

„Við horfum á uppskeruna og það er meira en allt annað. Þannig að einhver smá peningur fyrir það að fjöldi fólks getur stofnað fjölskyldu, þá eru þetta bara krónur og aurar," segir Líney Jóhannesdóttir sem þykir óeðlilegt að Innanríkisráðneytið geri íslenskri ættleiðingu ekki ráð fyrir stefnu þess í ættleiðingarmálum.

„Við fáum engin svör. Það er ekki yrt á okkur. Og óvissan er hræðileg. Það er miklu skárra að fá þá bara nei og leita annarra ráða."

Ef engin svör berast fljótlega frá ráðuneytinu ætlar parið að leita út fyrir landsteina.

„Við erum aðeins búin að kíkja til Ameríku, ég á fjölskyldu þar og það er brjálæðislegur kostnaður og mjög erfitt að komast þar inn. En þið eruð samt sem áður að hugleiða þetta? Já, eins og ég segi, maður er með allar klær úti og hugsar bara hvernig við getum stofnað fjölskyldu."