Skuldamál Regnbogabarna fyrir dóm

Höfundur barnabókar um forvarnir gegn einelti hefur stefnt Regnbogabörnum fyrir að hafa ekki greitt sér fyrir bókina. Regnbogabörn fara fram á að málinu verði vísað frá dómi.

Það var fyrir átta árum sem höfundur bókarinnar, Harpa Lúthersdóttir, gerði samkomulag við þáverandi framkvæmdastjóra samtakanna, Freyju Friðbjarnardóttur, um að gefa öllum börnum sem áttu að byrja í skóla haustið 2004 bókina að gjöf. Harpa lagði þá tvær milljónir í útgáfu bókarinnar og lét prenta fimm þúsund eintök. Ekkert varð þó af því að börnin fengju bókina, sem heitir „Má ég vera memm?"

Stefna Hörpu á hendur Regnbogabörnum hefur verið þingfest í Héraðsdómi Reykjavíkur og í gær fór fram málflutningur vegna frávísunarkröfu samtakanna.

Harpa baðst undan viðtali þegar fréttastofa náði tali af henni í morgun, en hún segist undrandi á því að samtök sem berjast gegn einelti skuli ekki standa við skuldbindingar sínar. Ekki hafði verið gerður formlegur samningur við Hörpu en hún hefur undir höndum tölvupóstsamskipti sem verða lögð fyrir dóminn.

Ekki náðist tal af Stefáni Karli Stefánssyni, stofnanda Regnbogabarna, í dag. Í samtali við Fréttablaðið í október sagði hann að samtökin hefðu boðið Hörpu að fá allar bækurnar til baka, auk fimm hundruð þúsunda króna greiðslu, en hún sætti sig ekki við þær málalyktir.