Allt að þriggja ára fangelsi liggur við brotum starfsmannanna

Guðmundur Haukur Gunnarsson og Jón Óttar Ólafsson, fyrrverandi lögreglumenn hjá sérstökum saksóknara, gætu átt yfir höfði sér allt að þriggja ára fangelsi verði þeir fundnir sekir um að hafa rofið þagnarskyldu. Komið hefur fram að mennirnir voru að störfum fyrir þrotabú Milestone á sama tíma og þeir störfuðu fyrir embætti sérstaks saksóknara. Fram hefur komið að þeir unnu skýrslu fyrir þrotabúið sem þeir fengu greiddar 30 milljónir fyrir.

Í almennum hegningarlögum er ákvæði þar sem segir að „opinber starfsmaður, sem segir frá nokkru, er leynt á að fara og hann hefur fengið vitneskju um í starfi sínu eða varðar embætti hans eða sýslan, skal sæta …1) fangelsi allt að einu ári. Hafi hann gert það til þess að afla sér eða öðrum óréttmæts ávinnings, eða noti hann slíka vitneskju í því skyni, má beita fangelsi allt að 3 árum."

Tekið er fram að sömu refsingu skuli sá sæta, sem látið hafi af opinberu starfi og segi frá eða misnoti vitneskju sem hann hafi fengið í stöðu sinni og leynt eigi að fara.