Lögmenn Annþórs ósáttir við framgang lögreglu

Lögmenn Annþórs Kristjáns Karlssonar, sem grunaður er um að hafa banað Sigurði Hólm Sigurðssyni, samfanga sínum á Litla Hrauni ásamt Berki Birgissyni, segja að ekkert bendi til þess, á þessu stigi, að Annþór eigi hlut að máli. Hann hafi staðfastlega neitað sök.

Í yfirlýsingu sem þeir sendu fjölmiðlum, síðdegis í dag, segir að réttarmeinafræðingur telji sig ekki geta fullyrt hvort sú blæðing, sem vitnað hefur til að hafi leitt Sigurð til bana, væri yfir höfuð af mannavöldum eða ekki.

Þeir gagnrýni einnig lögreglu og spyrja hvort það teljist eðlileg vinnubrögð í réttarríki að sakborningar og verjendur þeirra fái fyrst upplýsingar um rannsóknargögn frá fjölmiðlum.

Yfirlýsinguna má lesa hér fyrir neðan.

Reykjavík, 24. maí 2012

Undirritaðir lögmenn Annþórs Kristjáns Karlssonar vilja að gefnu tilefni koma á framfæri við fjölmiðla eftirfarandi yfirlýsingu:

„Undanfarna daga hafa fjölmiðlar farið mikinn í fréttaflutningi í tengslum við andlát Sigurðar Hólm Sigurðssonar, sem lést í fangelsinu að Litla-Hrauni fimmtudaginn 17. maí sl. Skjólstæðingur okkar hefur réttarstöðu sakbornings í málinu og var fyrr í dag, með úrskurði héraðsdóms Suðurlands, gert að sæta einangrun í gæsluvarðhaldi til 13. júní nk. Hefur gæsluvarðhaldsúrskurðurinn þegar verið kærður til Hæstaréttar.

Svo sem rakið hefur verið í fjölmiðlum komst réttarmeinafræðingur að þeirri niðurstöðu að Sigurður hafi látist af völdum innvortis blæðinga, en þess skal jafnframt getið að sami réttarmeinafræðingur taldi sig ekki geta fullyrt hvort sú blæðing, sem vitnað er til, væri yfir höfuð af mannavöldum eða ekki. Því síður er ekkert sem bendir til þess, á þessu stigi málsins, að skjólstæðingur okkar eigi þar einhvern hlut að máli. Þá hefur skjólstæðingur okkar staðfastlega neitað sök í málinu.

Undirritaðir lögmenn Annþórs Kristjáns Karlssonar hafa á þessu stigi málsins ekki fengið afhent nein rannsóknargögn og hafa þurft að reiða sig á upplýsingar sem fram hafa komið í fjölmiðlum. Á sama tíma og þeir sem fara með rannsókn málsins „verjast allra frétta" vegna þess hve rannsóknin er „á viðkvæmu stigi" streyma upplýsingar, sem lögregla ein hefur undir höndum, til fjölmiðla um gang málsins. Spyrja má hvort það geti talist eðlileg vinnubrögð í réttarríki að sakborningar og verjendur þeirra fái fyrst upplýsingar um rannsóknargögn, og eftir atvikum málavexti, í jafnalvarlegu máli og hér um ræðir, frá fjölmiðlum?"

Virðingarfyllst,

Guðmundur St. Ragnarsson, hdl.

Hólmgeir Elías Flosason, hdl.