Fjölskyldufyrirtæki tapaði gengismáli

Skuldastaða yfir þúsund fyrirtækja er í uppnámi eftir að Hæstiréttur sýknaði Lýsingu nú síðdegis um ólögmæta gengistryggingu þúsunda lánasamninga. „Vonbrigði," segja hjónin sem eiga fyrirtækið Smákrana og töpuðu málinu.

Málið snýst um lán sem lítið fjölskyldufyrirtæki á Smiðjuvegi í Kópavogi tók til að kaupa krana sem notaður er til að hífa ýmislegt innanhúss og -utan. Kraninn sem fyrirtækið keypti er núna í verkefni fyrir álverið í Straumsvík. Lánið sem hjónin tóku hjá Lýsingu var upphaflega 6,1 milljón króna en snarhækkaði við gengishrunið.

Ágreiningsefnið í málaferlunum var hvort fjármögnunarsamningurinn sem Smákranar gerðu við Lýsingu væri lán klætt í búning leigusamnings eins og fyrri gengisdómar hafa kveðið á um. Við slíka túlkun hefði gengistrygging samningsins verið ólögmæt. Smákranar unnu málið í héraði en Hæstiréttur sýknaði Lýsingu í dag og kvað upp þann dóm að samningurinn væri í raun og sann leigusamningur en ekki lán. Meðal annars vegna þess að ósannað taldist að Smákranar myndu eignast kranann við lok leigutímans. „Lýsing var sem sagt sýknuð í þessum dómi á þeim grundvelli að fjármögnunarsamningar Lýsingar væru skýrir leigusamningar og þar af leiðandi er heimilt að gengistryggja þá," segir Árni Ármann Árnason, lögmaður Lýsingar.

Lögmaður Smákrana, Einar Hugi Bjarnason, var hins vegar ekki sáttur við niðurstöðuna. „Niðurstaðan er auðvitað vonbrigði og ekki í samræmi við það sem lagt var upp með." Hann segir dóminn ganga þvert á niðurstöðu Hæstaréttar í sambærilegum málum. „Og mér sýnist í fljótu bragði að niðurstaða Hæstaréttar grundvallist á því að þessi samningsform séu ólík að ákveðnu leyti sem leiðir þá til ólíkrar niðurstöðu."