Verjandi líkti al-Thani málinu við mál Mladic

Ragnar H. Hall, verjandi Ólafs Ólafssonar, í al Thani málinu líkti stöðu sakborninga þess máls við stöðu Radko Mladic við fyrirtöku í Héraðsdómi Reykjavíkur í dag.

Deilt hefur verið um hvort verjendur og sakborningarnir, Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður, Ólafur Ólafsson, einn aðaleigenda bankans fallna, og Magnús Guðmundsson, fyrrverandi forstjóri Kaupþings í Lúxemborg, ættu að fá aðgang að rannsóknargögnum. Þar er um að ræða tölvupósta sem sérstakur saksóknari lagði hald á þegar málið var til rannsóknar og skrá yfir símtöl sem hleruð voru. Sérstakur saksóknari vill ekki láta þessi gögn af hendi. Verjendur hafa áður farið fram á að fá mynddiska með myndum af upptökum af yfirheyrslum, en Hæstiréttur hefur dæmt að sérstökum saksóknara beri ekki að láta mynddiskana af hendi.

Þegar Ragnar Hall gerði grein fyrir kröfu verjendanna í dag minnti hann á þær aðstæður sem hefðu komið upp í máli gegn Radko Mladic fyrir stríðsglæpadómstólnum í Haag þann 16. maí síðastliðinn. Þá fyrirskipaði dómari að hlé yrði gert á réttarhöldunum vegna þess að sækjandi hafi ekki látið verjendum í té málsgögn sem hann hefði átt að láta þá hafa. Verjendur Mladic fóru fram á sex mánaða hlé, en gert er ráð fyrir að réttahöldin hefjist á næstu dögum

Sérstakur saksóknari hefur boðið sakborningum og verjendum að skoða skrá yfir símtölin og útprentun af tilteknum símtölum sem eru á meðal rannsóknargagna í húsakynnum sérstaks saksóknara. Þar geti þeir einnig fengið útprentaða tiltekna tölvupósta. Ragnar sagði í dag að verulegt óhagræði væri af þessu fyrir bæði verjendur og sakborninga.