Óupplýst hver stóð á bak við stærsta fíkniefnainnflutning síðasta árs

Enn er óupplýst hverjir stóðu að innflutningi tíu kílóa af amfetamíni og rúmlega átta þúsund MDMA tafla til Straumsvíkur í svokölluðu Straumsvíkurmáli, en Sævar Sverrisson var hinsvegar dæmdur fyrir að flytja fíkniefnið til landsins. Í dómsorði segir að hann hafi ekki vitað hvað var í kössunum sem fluttir voru hingað til lands fyrir jól. Hann játaði hinsvegar skýlaust innflutning stera.

Auk Sævars var Geir Hlöðver Ericsson dæmdur í málinu. Þeir tveir voru báðir dæmdir fyrir að smygla sterum inn í landið. Sævar hlaut þyngsta dóminn, eða fjögurra og hálfs árs fangelsi. Geir fékk tveggja ára fangelsi.

Í niðurstöðu Héraðsdóms Reykjavíkur segir að þó það sé sannað að mennirnir hafi flutt inn steraefnin, sem komu með sömu sendingu og hin fíkniefnin, þá þýði það ekki sjálfkrafa að þeir félagar hafi einnig flutt inn harðari fíkniefnin í kössunum. Hitt sé þó óumdeilt, Sævar flutti kassana, sem innihéldu fíkniefnin, til landsins. Hann var því sakfelldur fyrir innflutninginn, ásetningurinn hafi þó verið lítill, eins og fram kemur í dómsorði.

Eina vitnið sem gat upplýst um það hverjir stóðu að fíkniefnaflutningnum var Íslendingur búsettur í Hollandi. Sá pakkaði efnunum inn í kassana sem síðar voru fluttir til Straumsvíkur. Hann bar vitni símleiðis, en neitaði að gefa upp nafn eða nöfn mannanna sem stóðu á bak við innflutninginn.

Birgir var sérstaklega spurður hvort sá sem stæði á bak við fíkniefnin væri Geir Hlöðver. Birgir sagðist þá ekki nafngreina neinn. Hann sagði einfaldlega dóminn verða að draga ályktun um það hvort þetta þýddi að Geir Hlöðver væri ekki maðurinn sem bað hann um að koma efnunum fyrir ásamt sterunum í kössunum.