Grunaðir innbrotsþjófar úrskurðaðir í gæsluvarðhald

Tveir karlar á þrítugsaldri hafa verið úrskurðaðir í gæsluvarðhald til 1. júní að kröfu lögreglunnar á höfuðborgarsvæðinu og var það gert á grundvelli rannsóknarhagsmuna. Mennirnir voru handteknir í gærmorgun eftir að þeir höfðu brotist inn í hús í Grafarvogi en þýfi fannst í fórum þeirra. Þjófarnir eru grunaðir um innbrot í fleiri hús á höfuðborgarsvæðinu. Þriðji maðurinn var handtekinn í tengslum við rannsóknina en ekki var farið fram á gæsluvarðhald yfir honum.

Þess ber að geta að handtöku þjófanna má þakka árverkni ónefnds íbúa en sá lét lögregluna vita um grunsamlegar mannaferðir. Lögreglan segir að þetta undirstriki að það sem einhverjum kann að finnast lítilfjörlegar upplýsingar geti einmitt orðið til þess að upplýsa mál. Þar er átt við lýsingu á mönnum og bifreiðum en gott er að skrifa slíkt hjá sér ef fólk tekur eftir einhverju óvenjulegu í sínu nánasta umhverfi. Sama gildir um bílnúmer en slíkar upplýsingar geta komið lögreglu á sporið.

Innbrotsþjófar fylgjast gjarnan með húsum áður en þeir láta til skarar skríða og því er mikilvægt að hafa þessi atriði í huga. Munið að það er betra að hringja einu sinni of oft í lögregluna með upplýsingar af þessi tagi en einu sinni of sjaldan.