Matarolía af ökrum íslenskra bænda

Íslensk matarolía af akrinum er það nýjasta sem íslenskir bændur bjóða landsmönnum en þetta er afurð repjuræktar undir Eyjafjöllum.

Repjuakurinn hjá Ólafi Eggertssyni, bónda á Þorvaldseyri, þekkist úr á gula litnum. Repjan var þegar farin að blómstra í síðustu viku en henni var sáð í fyrrasumar. Ólafur segir í viðtali í fréttum Stöðvar 2 að þetta líti mjög vel út, þrátt fyrir kalt vor, og repjan sé byrjuð að blómgast.

Í vetrarbyrjun 2010 vakti það landsathygli, fáum mánuðum eftir Eyjafjallajökulsgosið, þegar Ólafur hellti repjuolíu á gamlan traktor og ók af stað og sýndi þannig hvernig Íslendingar geta notað landið til að rækta sína eigin olíu.

En Ólafur sér einnig önnur not fyrir repjuolíuna og það er að tappa henni á flöskur og selja hana sem matarolíu. Hann segir að hún hafi reynst góð sem matarolía, og þar sem þetta sé enn lítil framleiðsla fáist þannig mest verðmæti fyrir olíuna.

Ólafur vonast þó til að geta einnig notað olíuna sem eldsneyti í framtíðinni og segir Íslendinga eiga nóg land til repjuræktar. Hann minnir á að þetta er tilraunaverkefni og víða um land eru menn að prófa sig áfram með ýmis afbrigði. Ef vel tekst til, og góð afbrigði fáist, komi að því að unnt verði að nota olíuna á vélar og hann sér fram á það að býli eins og Þorvaldseyri geti annað sinni olíuþörf með eigin framleiðslu.