Þýskaland gaf lýðræðinu stig í Eurovision

Þýski kynnirinn í Eurovision gaf lýðræðinu stig í gær þegar hann talaði um mikilvægi þess og sagði Evrópu fylgjast með gangi mála í Aserbaídjan. Svíar sem sigruðu með yfirburðum virðast vera í vandræðum með að finna vænlegan stað til að halda keppnina að ári liðnu.

Hin 28 ára gamla Loreen frá Svíþjóð var þakklát þegar úrslitin lágu fyrir í gærkvöldi.

Á blaðamannafundi sagðist Loreen ekki hafa hugsað um flutninginn sem hópvinnu og það hafi auðveldað henni að standa á sviðinu og bætti við að hún væri í raun feimin.

Mistök hennar í flutningi fyrir dómnefndum kvöldið áður, þegar hún gleypti gervisnjókorn og þurfti að hósta í miðju lagi, virðist ekki hafa komið að sök því lag Svíþjóðar fékk 372 stig, á annað hundrað stigum meira en lag Rússlands sem var í öðru sæti með 259 stig.

Ísland fékk 46 stig frá tíu þjóðum og endaði í 19. sæti. Finnar gáfu íslenska framlaginu flest stig, eða sjö talsins. Danir, Ungverjar og Eistar gáfu Gretu og Jónsa sex stig, Norðmenn fimm, Spánverjar, Slóvenar og Slóvakar fjögur, Þjóðverjar þrjú og Kýpverjar eitt.

Íslenski hópurinn fór fljótlega eftir keppnina út á flugvöll og er nú á leið til landsins.

Það voru þó ekki einungis keppendurnir sem vöktu athygli í gær því þýski kynnirinn sendi gestgjöfunum óvænt skilaboð rétt áður en hann fór yfir stigagjöfina.

Hin þýska Anke sagði það gott að geta kosið og óskaði gestgjöfunum alls hins besta í för sinni og bætti við að Evrópa fylgdist með og gaf þar í raun lýðræðinu stig sem er að mati margra ekki upp á marga fiska í Aserbaídjan.

Svíar eru þegar byrjaðir að velta fyrir sér keppninni sem þeir halda að ári liðnu. Globen-höllin í Stokkhólmi þykir henta vel en það er alls kostar óvíst að hún verði fyrir valinu því skipuleggjendur heimsmeistaramótsins í íshokkí hafa þegar bókað höllina á sama tíma og Eurovision fer fram. Hvort að þeir láti Eurovision aðdáendum hana eftir skulum við ósagt látið en samkvæmt sænskum miðlum eru nokkrir aðrir vænlegir staðir í Stokkhólmi sem og Gautaborg og Malmö.