Nýstárlegt viðvörunarkerfi gæti bjargað mannslífum

Viðvörunarkerfi sem gerir Neyðarlínunni kleyft að senda skilaboð í farsíma fólks á hættusvæðum, einungis nokkrum mínútum eftir að hættu er vart, verður tekið í notkun á þriðjudag. Tæknin skiptir sköpum og getur bjargað mannslífum.

Þeir sem verða á þjónustusvæðum í og við Vík í Mýrdal á þriðjudag fá send neyðarskilaboð klukkan fjögur síðdegis og verða beðnir um að yfirgefa svæðið vegna yfirvofandi hættu. Auðvitað verður tekið fram að um æfingu sé að ræða en frá og með þeim tíma getur Neyðarlínan sent slík skilaboð til íbúa og ferðamanna á ákveðnum svæðum.

Tökum Heklu sem dæmi. Ef vísbendingar um Heklugos hefðu borist Neyðarlínunni um eittleytið í dag hefði kerfið getað sent öllum þeim þrjúhundruð ferðamönnum á svæðinu neyðarskilaboð innan tveggja mínútna.

„Það tók 102 sekúndur að finna þá og koma skilaboðum til þeirra um það að þeir ættu að drífa sig beinustu leið þaðan sem þeir komu og hraða sér til byggða," segir Tómas Gíslason, aðstoðarframkvæmdastjóri Neyðarlínunnar.

Áður hafa starfsmenn símafyrirtækjanna þurft að hafa upp á númerunum og það gat tekið sex klukkustundir eða jafnvel lengri tíma. Viðvörunarkerfið er mikilvægt skref í að auka öryggi íbúa landsins og ferðamanna en neyðarskilaboðin verða send á bæði íslensku og ensku.

„Hugsanlega í seinni tíð reynum við að greina betur hvaðan hver sími er. Þannig getum við sent skilaboð á íslensku, ensku og pólsku ef um er að ræða pólskt númer."

„Ég á von á því að við getum hugsanlega bjargað einhverjum mannslífum," segir Tómas.

„Við fáum kannski hálftíma fyrirvara á Heklugosi þar sem jarðfræðingar eru farnir að mæla hana svona vel. Og það getur alveg verið nóg til þess að ferðamaður getu komið sér úr bráðri hættu áður en hún verður raunverulega að bráðri hættu."