Gagnrýna meirihlutann fyrir seinagang vegna umsagnar

Fulltrúar Sjálfstæðisflokksins í borgarráði gagnrýndu meirihlutann í borgarstjórn á borgarráðsfundi í dag fyrir að Reykjavíkurborg hafi ekki skilað inn umsögn vegna frumvarps að lögum um veiðigjöld. Í tilkynningu frá Sjálfstæðisflokknum segir að frumvarpið hafi verið sent borginni til umsagnar frá Alþingi fyrir um mánuði síðan. „en sú beiðni þingsins var aldrei kynnt borgarráði og engin umsögn um þetta stóra hagsmunamál því farið frá stærsta sveitarfélagi landins. Frestur til að skila inn umsögnum til Alþingis er liðin, en að beiðni borgarráðsfulltrúa Sjálfstæðisflokksins verður málið tekið upp aftur á næsta fundi borgarráðs," segir svo í tilkynningunni.

Júlíus Vífill Ingvarsson, borgarfulltrúi Sjálfstæðisflokksins, gagnrýnir þetta og segir í tilkynningunni:

„Auðvitað er ólíðandi að meirihluti Samfylkingar og Besta flokks skuli sitja á slíkri beiðni frá Alþingi enda er hér um að ræða gríðarlegt hagsmunamál fyrir borgarbúa og fyrirtæki í greininni. Annað hvort vita borgarfulltrúar meirihlutans ekki að í borginni eru starfrækt þrjú stór útgerðarfyrirtæki og eitt af þeim er stærsta útgerðarfyrirtæki landsins eða að þeir hafa ákveðið að láta hollustu við stjórnarflokkana ganga fyrir hagsmunum borgarbúa. Um fimmtungur alls afla á landinu kemur í land í Reykjavík og þúsundir borgarbúa hafa af því atvinnu að starfa við vinnslu eða veiðar. Borgarfulltrúar Samfylkingar og Besta flokks hafa lagt fram atvinnustefnu sína í löngu máli en þegar standa á vörð um atvinnulíf í borginni falla þeir á prófinu."