Segist næstum hafa misst formannsstól vegna orðaskipta við Baugsveldið

„Kenningin sem þú nefnir spratt helst upp á bloggsíðum Björns Bjarnasonar. Sjálfur tapaði ég næstum formannssætinu fyrr en ella fyrir samskipti min ill og hörð við Baugsveldið," svarar Össur Skarphéðinsson, utanríkisráðherra, í svokallaðri Beinni línu á dv.is, þar sem almenningi gefst færi á að spyrja ráðherrann út í þau mál sem brenna þeim á brjósti. Þarna svaraði Össur spurningu Ara Brynjólfssonar sem spurði:

„Veistu hvaðan samsæriskenningin um samband Samfylkingar og Jóns Ásgeirs á rætur sínar? Gætir þú tjáð þig eitthvað um það mál, hvort sem það er eitthvað á bak við það eður ei?"

Skilja má á svari Össurar að hann hafi næstum misst formannstól sinn vegna orðaskipta sem hann átti við Baugsveldið árið 2002. Þá sendi hann bréf til Baugs eftir að fyrirtækið neitaði að skipta við ræstingafyrirtæki bróður Össurar. Sjálfur sagði Össur í bréfinu til Jóns Ásgeirs Jóhannessonar, að uppsögnin væri „[...]ekkert annað en hrein hefndaraðgerð vegna skoðana minna."

Össur tapaði í formannskosningum fyrir Ingibjörgu Sólrúnu Gísladóttur, árið 2005.

Hann bætir svo um betur í svari sínu og segir: „Ég hef verið húðskammaður fyrir að segja að mér fannst Samfó hafa of mikla glýju í augunum gagnvart nýja kapítalinu. Jafnaðarmannaflokkar hér og erlendis stóðu sig ekki í aðhaldshlutverkinu.“

Þá spurði Guðmundur Franklín Jónsson, formaður stjórnmálaaflsins Hægri grænna hvort Össur ætlaði aftur í formannsframboð. Össur tók af öll tvímæli hvað það varðaði: „Ég nýt fráleitt sama stuðnings innan Samfó og þú innan þíns - enda bara starfsmaður á plani. Ég er saddur formannsdaga. Það er afgreitt mál. Sorrí Stína."

Hægt er að fylgjast með umræðunni á DV hér.