Pálmi lagði Iceland Express til um tvo milljarða

Eigandi iceland Express, Pálmi Haraldsson, hefur lagt félaginu til um tvo milljarða króna frá haustmánuðum samkvæmt fréttatilkynningu frá félaginu. Frá því var greint í Markaðnum í Fréttablaðinu í dag að Iceland Express hefði tapað tæplega þremur milljörðum króna í fyrra og vafi léki á rekstrargrundvelli félagsins.

Í tilkynningu frá Iceland Express segir að það hafi orðið alger viðsnúningur í rekstri félagsins frá því ný yfirstjórn tók til starfa sl. haust. Þannig hafi sala farmiða aukist umtalsvert á fyrstu mánuðum ársins og horfur fyrir sumarið séu góðar.

Svo kemur fram í tilkynningunni að með samstarfi við nýjan flugrekstraraðila, Holidays Czech Airlines, sé Iceland Express orðið með stundvísustu félögum sem gera út frá Keflavíkurflugvelli.

Það er eignarhaldsfélagið Fengur sem á Iceland Express. Í Markaðnum segir að Fengur hafi skilaði ársreikningi sínum fyrir árið 2010 þann 28. mars síðastliðinn. Einu eignir þess félags samkvæmt honum voru Iceland Express og breska flugfélagið Astraeus, sem fór í slitameðferð í fyrrahaust.

Vegna hlutdeildar í afkomu dótturfélaga sinna tapaði Fengur 1,5 milljörðum króna á árinu 2010 og eignarhlutir félagsins í þeim rýrnuðu úr því að vera 3,3 milljarða króna virði í árslok 2009 í að vera 486 milljóna króna virði í lok þess árs.

Í áritun endurskoðanda Fengs er vakin athygli á, án þess að gera fyrirvara við, að atburðir sem áttu sér stað eftir reikningsskil hafi valdið "því að rekstrarhæfi félagsins sé brostið nema til komi nýtt eigið fé eða skuldum verði breytt í eigið fé".

Samkvæmt upplýsingum Markaðarins eru allar skuldir Fengs við Nupur Holding SA í Lúxemborg, sem á allt hlutafé þess í gegnum dótturfélagið Academy S.a.r.l. Eigandi Nupur Holding er Pálmi Haraldsson.

Viðbót: Pálmi Haraldsson sendi frá sér eftirfarandi yfirlýsingu eftir að greinin birtist. Hún er svohljóðandi:

Yfirlýsing

Vegna fréttaflutnings um afkomu eignarhaldsfélagsins Fengs ehf.  óskast eftirgreindu komið á framfæri:

Eignarhaldsfélagið Fengur er skuldlaust gagnvart öðrum en eiganda sínum sem er félag í eigu undirritaðs. Engin ógn steðjar því að rekstrarhæfi eða styrk félagsins.

Reykjavík 11. apríl 2012, Pálmi Haraldsson stjórnarformaður Fengs ehf.