Guðmundur: Vil ekki sjá svona kæruleysisleg skot

Guðmundur Guðmundsson, landsliðsþjálfari, var í viðtali hjá Guðjón Guðmundssyni á Stöð 2 Sport eftir sigurinn á móti Síle í dag þar sem að hann fór yfir leik íslenska liðsins.

„Við gerðum það sem þurfti og um miðjan síðari hálfleik var ég farinn að skipta liðinu mikið út til að spara krafta fyrir morgundaginn. Það kom niður á leik okkar síðustu fimmtán mínúturnar þegar þetta var orðin hálfgerð leikleysa. Við spiluðum ekki nægilega vel í lokin og áttum að vinna þetta stærra en við gerðum það sem þurfti," sagði Guðmundur.

„Fyrri hálfleikurinn var svolítið kaflaskiptur. Við spiluðum ágætis vörn og fengum bara sjö mörk á okkur sem er ekki hægt að kvarta yfir. Hraðaupphlaupin voru aftur á móti ekki nógu agressív, Guðjón Valur var að skora en aðrir tóku lítinn þátt að mínu mati. Það getum við lagað því við þurfum að vera agressívari sem lið í hraðaupphlaupunum," sagði Guðmundur.

„Sóknarleikurinn gekk tiltölulega vel þegar við vorum á fullu enda var þetta kannski ekki sterk vörn. Við gerum okkur seka með að fara með alltof mikið af dauðafærum þar sem leikmenn voru að taka kæruleysisleg skot. Menn voru að reyna að snúa boltanum framhjá markvörðunum og það er eitthvað sem ég vil ekki sjá," sagði Guðmundur og hann viðurkenndi að það hafi verið stress í íslenska liðinu í leiknum.

„Ég held að menn hafi verið pínulítið taugaveiklaðir því mér fannst þungt yfir liðinu fyrstu tíu mínúturnar og það er oft einkenni þess þegar menn eru stressaðir og vita að það er mikið undir. Það er alltaf svolítill skrekkur í mönnum þegar þeir byrja svona verkefni en fyrstu tólf mínúturnar í seinni hálfleik voru mjög öflugar, bæði varnarlega og sóknarlega," sagði Guðmundur.

Íslenska landsliðið mætir Japan á morgun og er það hreinn úrslitaleikur um sæti á Ólympíuleikunum í London. Guðmundur segir liðið þurfa að spila betur þá.

„Japanir eru stórhættulegir því þeir eru með mjög fljóta leikmenn og eru óþægilegur andstæðingur. Við þurfum að vera á varðbergi gagnvart því. Þeir gerðu Austurríkismönnum mikla skráveifu og pökkuðum þeim saman á síðasta HM fyrir ári síðan. Þeir eru tveimur mörkum undir í hálfeik á móti Króötum sem segir sína sögu um styrkleika þeirra. Þeir eru miklu sneggri og spila miklu hraðar en þetta Síle-lið og við þurfum að gera miklu betur í leiknum á morgun heldur en í dag," sagði Guðmundur að lokum.