Gunnar Andersen bað Ársæl um að senda gögn til DV

Ársæll Valfells, lektor við Háskóla Íslands, segir að hann hafi verið milligöngumaður þegar gögn láku frá Landsbankanum en Gunnar Andersen fyrrverandi forstjóri Fjármálaeftirlitsins hefur verið kærður til lögreglu vegna þess. Gögnin vörðuðu fjármál Guðlaugs Þórs Þórðarsonar alþingismanns. Ársæll segir í yfirlýsingu sem hann sendi frá sér að maður nokkur hafi bankað á dyrnar hjá sér og beðið sig um að skila sendingu til Gunnars Andersen.

Ársæll segist strax hafa haft samband við Gunnar, sem hafi beðið sig um að koma sendingunni á fréttastofu DV. „Ég treysti dómgreind þáverandi forstjóra FME og fór eftir beiðni hans í þessu einstaka tilviki."

Ársæll segist enga vitneskju hafa haft um innihald sendingarinnar og hefur hann þegar skýrt yfirvöldum frá aðkomu sinni að málinu, sem og öðrum hlutaðeigandi.