Oscar Carlén fór í sína sjöttu hnéaðgerð

Sænski handboltakappinn Oscar Carlén verður frá keppni næsta árið eftir að hann þurfti að gangast undir enn einu aðgerðina vegna þrálátra hnémeiðsla. Carlén er á mála hjá Hamburg í Þýskalandi.

Carlén hefur þrívegis slitið krossband í hné og hefur farið í sex hnéaðgerðir. Hann greindi frá því einnig í samtali við þýska fjölmiðla að hann hefur alls þrettán sinnum verið svæfður á ævinni. „Ég var líka mjög óheppinn í æsku," sagði hann.

Aðgerðin gekk vel en svo gæti farið að hann þurfi að leggja skóna á hilluna, ef endurhæfingin gengur ekki eftir óskum. „Þetta hafa verið mjög erfiðir mánuðir en mér hefur aldrei liðið verr en á þriðjudaginn. Þá lá fyrir að fara í aðgerð sem myndi hafa úrslitaáhrif um minn íþróttaferil."

„Læknarnir segja að aðgerðin hafi gengið vel. Það eina sem ég vil er að fá að spila fyrir fullri höll í Hamburg á nýjan leik."