Oddur tekinn inn í landsliðshópinn

Guðmundur Guðmundsson landsliðsþjálfari hefur ákveðið að velja Odd Gretarsson, hornamann úr liði Akureyrar, sem sextánda mann inn í íslenska landsliðið fyrir leikinn gegn Slóveníu í dag.

Guðmundur hefur haldið einu sæti lausu í landsliðshópnum og þeir Oddur, Rúnar Kárason og markvörðurinn Aron Rafn Eðvarðsson hafa verið fyrir utan hóp.

Hinn vinstri hornamaðurinn í íslenska landsliðinu, Guðjón Valur Sigurðsson, hefur spilað hverja einustu sekúndu í leikjunum tveimur til þessa og gæti því mögulega fengið einhverja hvíld í kvöld.

Guðmundur má svo gera tvær breytingar á íslenska landsliðshópnum áður en milliriðlakeppnin hefst, ef Íslands kemst þangað.

Ísland mætir Slóveníu klukkan 17.10 í kvöld og dugar jafntefli til að komast áfram í milliriðlakeppnina með tvö stig. Leiknum verður vitanlega lýst á Boltavakt Vísis og Fréttablaðsins.