Norðmenn mörðu sigur gegn Slóveníu

Noregur vann nauman sigur, 28-27, á Slóvenum í opnunarleik D-riðils í Vrsac í kvöld. Leikurinn var afar kaflaskiptur en Norðmenn voru sterkari á lokamínútunum og tryggðu sér tvö dýrmæt stig.

Norðmenn byrjuðu leikinn með miklum látum og eftir tíu mínútna leik voru þeir með yfirburðastöðu, 6-0. Fyrsta mark Slóvena í leiknum kom ekki fyrr en eftir tæpar 11 mínútur og þá skoruðu þeir þrjú mörk á einni mínútu.

Markvörður Slóvena, Gorazd Skof, komst í mikið stuð og fór að verja eins og brjálæðingur. Slóvenar keyrðu góð hraðaupphlaup og minnkuðu muninn smám saman.

Það tókst þeim rétt fyrir hlé og staðan í hálfleik var 14-14.

Slóvenar hófu síðari hálfleikinn með álíka látum og þeir luku þeim fyrri. Norðmenn voru sem steinrunnir er baráttuglaðir Slóvenar keyrðu yfir þá. Fljótlega í síðari hálfleik var staðan orðin 16-20 fyrir Slóvena.

Norðmenn neituðu að gefast upp og unnu sig aftur inn í leikinn. Þegar korter lifði leiks náðu þeir að jafna, 21-21.

Lokamínútur leiksins voru æsispennandi þar sem liðin héldust í hendur. Ole Erevik datt svo í stuð í norska markinu, varði meðal annars tvö víti og Noregur leiddi með tveimur mörkum, 26-24, þegar tvær mínútur voru eftir.

Slóvenar minnkuðu muninn í eitt mark en svo var markvörður þeirra rekinn af velli fyrir mótmæli. Christoffer Rambo kom Noregi í 27-25, Slóvenía svaraði að bragði en Norðmenn fengu víti er 13 sekúndur voru eftir af leiknum. Það tók Havard Tvedten og skoraði örugglega. Slóvenar skoruðu síðasta markið en það dugði ekki til.

Bjarte Myrhol, Christoffer Rambo og Erlend Mamelund skoruðu allir sex mörk fyrir Noreg og Ole Erevik varði 20 skot í rammanum. Uros Zorman og Dragan Gajic voru markahæstir Slóvena með fimm mörk. Markvörðurinn skapheiti, Gorazd Skof, varði 19 skot.