Flogið til 27 áfangastaða

Boðið verður upp á flug til 27 áfangastaða frá Keflavíkurflugvelli í vetur. Tveir þeirra hafa ekki áður verið á vetrardagskrá, eftir því sem fram kemur á vefnum Túristi.is. Það er bandaríska borgin Denver og Salzburg í Austurríki. Tilkoma þeirra ætti að gleðja skíðaáhugafólk því þær eru báðar í nágrenni við þekktustu skíðasvæði veraldar. Á þremur flugleiðum ríkir meiri samkeppni en Íslendingar eiga að venjast. Þannig munu fjögur félög keppa um farþega til og frá London, þrjú fljúga til Oslóar og þrjú til Kaupmannahafnar.