Svíar að fara svipaða leið og íslensku silfurstrákarnir fyrir fjórum árum

Sænska karlalandsliðið í handbolta tapaði tveimur leikjum í riðlakeppni Ólympíuleikanna en spilar engu að síður um gullið á leiknum á sunnudaginn. Svíar unnu 27-26 sigur á Ungverjum í undanúrslitunum í dag. Það er hægt að finna tvo samnefnara með sænska landsliðinu og íslenska silfurliðinu frá því Peking fyrir fjórum árum.

Svíar verða ekki með á HM á Spáni á næsta ári því þeir duttu út fyrir Svartfellingum í

umspilinu fyrr í sumar. Íslenska liðið missti einnig af HM í Króatíu 2009 eftir að hafa dottið út fyrir Makedóníu í umspili í aðdraganda Ólympíuleikanna.

Svíum gekk líka illa á EM í Serbíu í janúar síðastliðnum þar sem liðið vann aðeins einn leik og endaði í 12. sæti. Íslenska landsliðið vann bara tvo af átta leikjum sínum á EM 2008 og endaði í 11. sæti.

Bæði þessi verðlaunalið á Ólympíuleikum eiga það því sameiginlegt að hafa komið sterkir til baka á Ólympíuleikum eftir mikið svekkelsi fyrr á sama ári.